काठमाडौँ, २३ फागुन । नेपाली राष्ट्रिय फुटबल टिमका पूर्वप्रशिक्षक अब्दुल्लाह अलमुताइरीले वर्षको उत्कृष्ट प्रशिक्षकको अवार्ड जितेका छन् ।
मङ्गलवार नेपाल खेलकुद पत्रकार मञ्च (एनएसजेएफ) ले काठमाडौँको प्रज्ञा प्रतिष्ठानमा एक कार्यक्रमको आयोजना गरेर अलमुताइरीलाई ‘स्पोर्ट्स अवार्ड-२०७८’ अन्तर्गत वर्षको उत्कृष्ट प्रशिक्षकको अवार्ड दिएको हो ।
यस विधामा क्रिकेटका डेभ वाटमोर, भलिबलका जगदीश भट्ट, तेक्वान्दोका कविराज नेगी र बक्सिङका दीपक महर्जन मनोनयनमा थिए । बाँकी चार जना मनोनीतलाई पछि पार्दै अलमुताइरीले अवार्ड जितेका हुन् ।
अलमुताइरीकै प्रशिक्षणमा नेपाल पहिलो पटक एएफसी एसियन कप २०२३ को छनोटको तेस्रो चरणसम्म पुगेको थियो ।
