बङ्लादेश, ३० फागुन । विश्व च्याम्पियन इङ्ल्यान्डसँगको टी-२० अन्तर्राष्ट्रिय क्रिकेट शृङ्खलामा बङ्लादेशले क्लीन स्वीप गरेको छ ।
तेस्रो तथा अन्तिम टी-२० क्रिकेटमा इङ्ल्यान्डलाई १६ रनले हराउँदै बङ्लादेशले तीन खेलको शृङ्खलामा क्लिन स्वीप गरेको हो ।
बङ्लादेशले दिएको १ सय ५९ रनको लक्ष्य पछ्याएको इङ्ल्यान्डले निर्धारित २० ओभरमा ६ विकेट गुमाउँदै १ सय ४२ रनमात्र बनाउन सक्यो । इङ्ल्यान्डका लागि डविड मालनले ५३ र जस बटलरले ४१ रन बनाए । बलिङतर्फ बङ्लादेशका तस्किन अहमदले २ तथा तनभिर इस्लाम, शाकिब अल हसन र मुस्ताफिजुर रहमानले १-१ विकेट लिएका थिए ।
यसअघि ढाकामा टस हारेर ब्याटिङ गरेको बङ्लादेशले निर्धारित २० ओभरमा २ विकेट गुमाएर १ सय ५८ रन बनायो । बङ्लादेशका लागि लिटन दासले ७३ र नजमुल होसैन शान्तोले नटआउट ४७ रन बनाए । बलिङतर्फ इङ्ल्यान्डका आदिल रशिद र क्रिस जोर्डनले १-१ विकेट लिएका थिए ।
बङ्लादेशले इङ्ल्यान्डलाई पहिलो खेलमा ६ विकेट र दोस्रो खेलमा ४ विकेटले हराएको थियो । इङ्ल्यान्ड सन् २०२२ मा भएको टी-२० विश्व कपको च्याम्पियन हो ।