पाकिस्तान, २९ वैशाख । पाकिस्तानको अदालतले भ्रष्टाचारको अभियोगमा पक्राउ परेका पूर्वप्रधानमन्त्री इमरान खानलाई जमानतमा रिहा गर्न र कम्तीमा दुई हप्ता फेरि नपक्रिन आदेश दिएको छ ।
सर्वोच्च अदालतले खानको गिरफ्तारीलाई अवैध ठहर गरेको भोलिपल्ट इस्लामाबाद उच्च अदालतले खानलाई मुक्त गर्न र कम्तीमा दुई हप्ता फेरि पक्राउ नगर्न आदेश दिएको बीबीसीले जनाएको छ । न्यायाधीशहरूले खानलाई कम्तीमा दुई हप्ता सुरक्षित हुने गरी जमानत दिएका हुन् ।
यसअघि खानले रिहा भएलगत्तै आफूलाई पुन: पक्राउ गरिने बताएका थिए । खानको पक्राउसँगै पाकिस्तानी सेनासँगको उनको तनाव बढेको थियो । प्रधानमन्त्री पदबाट हटेपछि खान सेनाको सबैभन्दा प्रखर आलोचक बनेका छन् ।
गएको मङ्गलवार खान पक्राउ परेपछि पाकिस्तानभरि चर्किएको प्रदर्शनका क्रममा कम्तीमा १० जनाको ज्यान गएको छ भने दुई हजार जनाभन्दा बढी मानिस पक्राउ परेका छन् ।