काठमाडौं,१८ वैशाख । अल्पमतमा परेका कोशीका मुख्यमन्त्री केदार कार्कीले प्रदेश सभाबाट विश्वासको मत नलिने अडान दोहोर्याउनुभएको छ ।
मंगलबार प्रदेश प्रमुख परशुराम खापुङलाई भेटेर प्रदेश सभाबाट पारित संकल्प प्रस्तावकै आधारमा आफूले विश्वासको मत लिनुनपर्ने जिकिर गर्नुभएको हो । गत चैत २६ गते नेकपा एमाले र माओवादी केनद्रले सरकारलाई दिएको समर्थन फिर्ता लिएपछि कार्की अल्पमतमा पर्नुभएको छ ।
कार्कीले वैशाख २५ गतेभित्र प्रदेश सभाबाट विश्वासको मत लिनुपर्ने हुन्छ । तर, उहाले आफू संविधानको धारा १६८ को उपधारा ५ अनुसार नियुक्त भएको भन्दै विश्वासको मत लिनुनपर्ने अडान लिनुभएको छ । कार्कीले विश्वासको मत नलिने अडान लिएपछि गत साता एमाले र माओवादीले प्रदेश सभाको विशेष अधिवेशनमार्फत संकल्प प्रस्ताव पारित गरेका थिए ।
एमाले प्रदेश संसदीय दलका प्रमुख सचेतक रेवतीरमण भण्डारी प्रस्तावक र किशोरचन्द्र दुलाल र गणेशप्रसाद उप्रेती समर्थक रहेको सो प्रस्ताव बहुमतले पारित भएको थियो । संकल्प प्रस्ताव पारित भएपछि प्रदेश सभाले कार्कीलाई विश्वासको मत लिन निर्देशन दिएको थियो । तर, कार्कीले निर्देशन नमान्ने बताउँदै आउनु भएको छ ।
वैशाख २५ गतेसम्म विश्वासको मत नलिने उहालाई सोही दिन स्वत पदमुक्त गरेर एमालेका हिक्मत कार्कीलाई मुख्यमन्त्री नियुक्त गर्ने प्रदेश प्रमुखको तयारी छ । सो तयारीबारे जानकारी पाएपछि कार्की आज तीन पन्ने पत्र बोकेर प्रदेश प्रमुखको कार्यालय पुग्नु भएको हो । सो पत्रमा उहाले संकल्प प्रस्तावकै कारण गैर संवैधानिक काम नगर्न प्रदेश प्रमुखलाई आग्रह गर्नुभयो ।
