काठमाडौँ, २२ बैशाख । नेपालले पाहुना टोली वेस्ट इन्डिज ‘ए’ संगको पाँच खेलको टी–२० शृङ्खलाको अन्तिम खेल आज खेल्दैछ । टियु क्रिकेट मैदानमा हुने यो खेल १२ः१५ बजेबाट सुरु हुनेछ ।
पाँच खेलको शृङ्खलामा तीन खेल जितेको वेष्ट इन्डिज ए ले एक खेल अगावै ३(१ ले उपाधि आफ्नो पक्षमा पारिसकेको छ । टि(२० विश्वकप क्रिकेटको तयारीमा रहेको नेपालले त्यसको तयारी स्वरुप घरेलु मैदानमा शृङ्खला खेलेको हो ।
विश्वकप क्रिकेट आगामी जेठ १९ गतेबाट अमेरिका र वेष्ट इन्डिजमा संयुक्त रुपमा आयोजना हुदैछ । समूह डी मा रहेको नेपालको समुहमा नेदरल्यान्ड्स, श्रीलंका, दक्षिण अफ्रिका र बंगलादेश रहेका छन् ।
जेठ २२ गते नेदरल्यान्ड्स विरुद्ध पहिलो खेल खेल्दै नेपालले विश्वकपको यात्रा शुरु गर्नेछ । विश्वकपमा खेल्नका लागि क्यानले रोहितकुमार पौडेलको कप्तानीमा १५ सदस्यीय राष्ट्रिय टोलीको घोषणा गरिसकेको छ ।
