झापा, २१ असार । नेपाल–भारत सीमामा मानव तस्करीको प्रयास फेरि एकपटक विफल भएको छ। भारतीय सीमा सुरक्षा बल (एसएसबी) को सतर्कताका कारण १५ वर्षीया नेपाली किशोरीलाई मानव तस्करको सम्भावित जालोबाट उद्धार गरिएको छ।
प्राप्त जानकारीअनुसार, भारतको पश्चिम बंगालस्थित उत्तर दिनाजपुर जिल्लाका एक युवकले राम्रो भविष्य र विभिन्न प्रलोभन देखाएर ती किशोरीलाई भारत लैजान खोजेका थिए। घटना हुनुभन्दा दुई दिनअघि मात्रै उनीहरूबीच चिनजान भएको भए पनि युवकले किशोरीको विश्वास जितेर सीमापार गर्न तयार पारेको खुलेको छ।
उद्धार गरिएकी किशोरीको पारिवारिक अवस्था पनि निकै कमजोर रहेको जनाइएको छ। बाल्यकालमै आमाको मृत्यु भएको र करिब १० वर्षअघि बुबा दोस्रो श्रीमतीसँग कामका लागि गएपछि सम्पर्कविहीन बनेकाले उनी बेसहारा अवस्थामा रहेकी थिइन्। आरोपीले यही अवस्थाको फाइदा उठाएर उनलाई प्रलोभनमा पारेको प्रारम्भिक अनुसन्धानबाट खुलेको छ।
भारत–नेपालको पानीट्याङ्की सीमा नाकामा नियमित जाँचका क्रममा एसएसबीका सुरक्षाकर्मीले उनीहरूमाथि शंका लागेपछि सोधपुछ गरेका थिए। त्यसक्रममा मानव तस्करीको आशंका पुष्टि भएपछि किशोरीलाई तत्काल उद्धार गरिएको थियो। आरोपीलाई नियन्त्रणमा लिएर थप अनुसन्धानका लागि स्थानीय प्रहरीको जिम्मा लगाइएको छ।
उद्धार गरिएकी किशोरीलाई आवश्यक सुरक्षा र संरक्षण प्रदान गरिएको छ।
सीमा क्षेत्रमा सक्रिय सामाजिक संस्था शक्ति वाहिनीका अनुसार नेपाल–भारत सीमा मानव तस्करहरूको उच्च जोखिमयुक्त क्षेत्रमध्ये एक हो। गरिबी, पारिवारिक विखण्डन, रोजगारीको प्रलोभन र राम्रो भविष्यको झुटो आश्वासन देखाएर महिला तथा बालबालिकालाई तस्करी गर्ने प्रयास भइरहने भएकाले सीमा सुरक्षा निकायहरूले निगरानी र कारबाहीलाई निरन्तर तीव्र बनाइरहेका छन्।
