देशका पहाडी क्षेत्रमा वर्षा र हिमपातको सम्भावना, तराईका केही स्थानमा गर्मी बढ्ने

मौसम पूर्वानुमान महाशाखाका अनुसार हाल हिमाली तथा पहाडी भूभागसँगै मधेश, बागमती, गण्डकी र लुम्बिनी प्रदेशका तराई क्षेत्रमा आंशिक बदली रहेको छ भने अन्य तराई क्षेत्रमा मौसम मुख्यतया सफा रहेको छ।

कोशी, बागमती, गण्डकी र लुम्बिनी प्रदेशका हिमाली तथा पहाडी क्षेत्रका केही स्थान र कर्णाली प्रदेशका एक–दुई स्थानमा मेघगर्जन तथा चट्याङसहित हल्कादेखि मध्यम वर्षा भइरहेको विभागले जनाएको छ।

आज दिउँसो हिमाली क्षेत्र तथा कोशी प्रदेशका पहाडी भूभागमा सामान्य बदली रहने अनुमान गरिएको छ। अन्य पहाडी क्षेत्र तथा कोशी, मधेश, बागमती र गण्डकी प्रदेशका तराई क्षेत्रमा आंशिक बदली रहनेछ भने लुम्बिनी र सुदूरपश्चिम प्रदेशका तराई क्षेत्रमा मौसम मुख्यतया सफा रहने अपेक्षा गरिएको छ।

विभागका अनुसार कोशी, बागमती र गण्डकी प्रदेशका हिमाली तथा पहाडी भूभागका केही स्थानमा तथा लुम्बिनी, कर्णाली र सुदूरपश्चिम प्रदेशका एक–दुई स्थानमा मेघगर्जन, चट्याङसहित वर्षा र उच्च हिमाली क्षेत्रमा हिमपात हुन सक्ने सम्भावना रहेको छ। कोशी प्रदेशको तराईका केही स्थान तथा मधेश प्रदेशका एक–दुई स्थानमा पनि वर्षा हुन सक्ने पूर्वानुमान गरिएको छ।

यता, लुम्बिनी र सुदूरपश्चिम प्रदेशका तराई क्षेत्रमा तातो दिनको प्रभाव कायम रहने सम्भावना रहेको विभागले जनाएको छ।

आज राति पनि कोशी, मधेश, बागमती र गण्डकी प्रदेशमा आंशिक बदली रहनेछ। लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागमा पनि आंशिक बदली रहने अनुमान छ भने ती प्रदेशका तराई क्षेत्रमा मौसम मुख्यतया सफा रहनेछ।

रातिको समयमा कोशी प्रदेशका हिमाली तथा पहाडी भूभागका केही स्थानमा मेघगर्जन र चट्याङसहित मध्यम वर्षा तथा हिमपात हुन सक्ने सम्भावना रहेको छ। बागमती र गण्डकी प्रदेशका एक–दुई स्थानमा हल्का वर्षाको सम्भावना छ भने कोशीको तराई र मधेश प्रदेशका केही क्षेत्रमा पनि वर्षा हुन सक्ने विभागले जनाएको छ।