काठमाडौं, २० वैशाख । आज दिउँसो देशका विभिन्न स्थानमा मेघगर्जन र चट्याङसहित मध्यम वर्षा तथा हिमपात हुने सम्भावना रहेको छ। जल तथा मौसम विज्ञान विभागका अनुसार पहाडी र हिमाली क्षेत्रमा सामान्यतया बदली रहनेछ भने तराई क्षेत्रमा आंशिक बदली रहने अनुमान गरिएको छ।
कोशी र मधेश प्रदेशका केही तराई क्षेत्रसहित देशका पहाडी तथा हिमाली भू–भागका विभिन्न स्थानमा वर्षा र हिमपात हुन सक्नेछ। साथै, बाँकी तराईका एक–दुई स्थानमा पनि मेघगर्जनसहित वर्षा हुने सम्भावना रहेको छ।
रातिको समयमा पनि देशभर बदली कायम रहने जनाइएको छ। कोशी, मधेश, बागमती, गण्डकी र लुम्बिनी प्रदेशका केही स्थानमा तथा कर्णाली र सुदूरपश्चिम प्रदेशका थोरै स्थानमा मेघगर्जन, चट्याङ, हावाहुरी र असिनासहित मध्यम वर्षा तथा हिमपात हुन सक्नेछ।
विशेषगरी लुम्बिनी प्रदेशका पहाडी क्षेत्रमा एक–दुई स्थानमा भारी वर्षा हुन सक्ने चेतावनी दिइएको छ। मौसमका कारण सतर्कता अपनाउन महाशाखाले आग्रह गरेको छ।
