पाकिस्तान, ५ पुस । पाकिस्तानमा खाना पकाउने ग्यासको सिलिन्डर विस्फोट हुँदा १२ जनाको मृत्यु भएको छ । ग्यास सिलिन्डर विस्फोट हुँदा अन्य १३ जना घाइते भएका छन् ।
पाकिस्तानको बलुचिस्तान प्रान्तको लासबेला जिल्लामा एक पसलमा ग्यास सिलिन्डर भर्ने क्रममा विष्फोट भएको थियो । विस्फोटपछि आगो लागेको र आगोले अरू सिलिन्डर पनि पड्किँदा धेरै क्षति भएको चिनियाँ समाचार संस्था सिन्ह्वाले जनाएको छ ।
विस्फोटमा घाइते भएका १३ जनामध्ये केहीको अवस्था चिन्ताजनक रहेको खबरमा उल्लेख छ । विस्फोटपछिको आगलागीबाट चार वटा पसल र १२ वटा गाडी जलेर ध्वस्त भएका छन् ।
