काठमाडौं, ३१ साउन । नेकपा एमालेका अध्यक्ष केपी शर्मा ओलीले गृह जिल्ला झापा पुगेर आफू नेतृत्वबाट बिदा नहुने अडानलाई कायम राख्दै थप चुनौती दिएका छन् ।
उनले सामाजिक सञ्जालमा स्ट्याटस लेख्दै नेताहरूले आफूलाई हटाउन लागेकोप्रति असन्तुष्ट जनाउँदै आफ्नो विकल्प नरहेको स्पष्ट पारे ।
झापा पुगेर मिसन पार्टी जागरण अभियान’को उद्घाटन गर्दै ओलीले बागमती प्रदेश संसदीय दलका नेता जेएन थपलिया आफ्नो निवासमा लडेको विषयमा पनि असन्तुष्टि जनाएका छन् ।
उनले जगन्नाथ त्यहाँ लडेको भनेर अनावश्यक प्रचारबाजी गरिएको आरोप लगाए ।
ओलीले संगठित सदस्यभन्दा कम मत आएको विषयमा लाज मान्दै मतै नहाल भनेर आफ्नै पार्टीका नेताहरूले उर्दी गर्दै हिँडेको टिप्पणी समेत गरे ।
ओलीले आफू नेतृत्वबाट बिदा हुनुपर्छ भन्ने आवाज उठेकोमा जवाफ दिँदै भने, ‘आज पुनर्गठन होइन, पुनर्जागरणको अवस्थामा छौँ । नेतृत्व फेर्ने प्रक्रियालाई मात्र पुनर्गठन भनिन्न । अहिले पार्टी पुनर्गठन जो भनिएको छ, वास्तवमा पुनर्गठन होइन ।’
उनले आफ्नो विकल्प पार्टीमा नरहेको संकेत गर्दै केही खान नपाएकाहरूले यसपटक भोट हालेको तर खान पाएकाहरूले नै घात गरेको उल्लेख गरे ।
‘जनसंगठनको होला, सिङ्गै पार्टीको पुनर्गठन होइन । कुनै कमिटीको होला । त्यस्तो व्यापक रूपमा भइरहन्छ । अधिवेशनहरू गरिरहन्छौँ, पुनर्गठन हुँदैन ।’,उनले भने, ‘पर्याप्त खान पाएकाहरूले गुनासो गरेका छन्,’ ओलीले भने, ‘केही नपाएकाले यसपटक पनि भोट हाले । केही पाएकाले यसपटक पनि भोट हालेनन् ।’
ओलीले हिजो इलामको कार्यक्रममा पनि आफू नेतृत्वबाट पछि नहट्ने बताएका थिए।
