काठमाडौं, २४ साउन । सरकार सञ्चालन र सत्ता साझेदारबीचको समन्वयलाई लिएर विभिन्न चर्चा भइरहेका बेला प्रधानमन्त्री बालेन शाह र राष्ट्रिय स्वतन्त्र पार्टी (रास्वपा)का सभापति रवि लामिछानेबीच भेटवार्ता भएको छ ।
आइतबार साँझ प्रधानमन्त्रीको सरकारी निवास बालुवाटारमा भएको भेटमा दुई नेताबीच करिब ४५ मिनेट एक्लाएक्लै तथा अनौपचारिक छलफल भएको बताइएको छ ।
पछिल्लो समय प्रधानमन्त्री शाहले सामाजिक सञ्जालमार्फत आफूले विभिन्न चुनौतीबीच अघि बढ्नुपरेको अभिव्यक्ति दिएपछि सत्ता साझेदार दलभित्र त्यसबारे चासो र असन्तुष्टि देखिएको थियो । यही पृष्ठभूमिमा भएको भेटलाई राजनीतिक वृत्तमा अर्थपूर्ण रूपमा हेरिएको छ ।
सरकार सञ्चालन र नियुक्तिबारे छलफल
स्रोतका अनुसार भेटमा सरकारका आगामी प्राथमिकता, राजनीतिक तथा कूटनीतिक नियुक्ति र मन्त्रीहरूको कार्यसम्पादनबारे छलफल भएको थियो ।
विशेषगरी विभिन्न मुलुकका लागि राजदूत नियुक्ति तथा उच्च तहका नियुक्तिका विषयमा दुई नेताबीच धारणा आदानप्रदान भएको बताइएको छ । रास्वपाबाट सरकारमा सहभागी मन्त्रीहरूको भूमिकाका विषयमा समेत कुराकानी भएको स्रोतको दाबी छ ।
त्यसैगरी प्रधानमन्त्री शाहको सम्भावित भारत भ्रमण तथा रास्वपा सभापति लामिछानेको चीन भ्रमणको तयारीबारे समेत छलफल भएको बताइएको छ । दुवै भ्रमणका क्रममा कूटनीतिक सन्तुलन र तयारीका विषयमा समेत कुराकानी भएको स्रोतले जनाएको छ ।
सम्बन्धमा दरारको चर्चा अस्वीकार
बालुवाटार स्रोतले दुई नेताबीच सम्बन्धमा ठूलो दरार आएको भन्ने चर्चालाई अस्वीकार गरेको छ । भेटलाई नियमित तथा अनौपचारिक राजनीतिक परामर्शका रूपमा लिनुपर्ने स्रोतको भनाइ छ ।
प्रधानमन्त्री शाह नेतृत्वमा सरकार गठन भएपछि लामिछाने बालुवाटार पुगेर भेटवार्ता गरेको यो दोस्रो पटक भएको बताइएको छ ।
सरकारको कार्यशैलीबारे रास्वपामा पनि बहस
यसबीच सरकारको कार्यशैली र अपेक्षित परिणामका विषयमा आलोचना बढ्दै गएपछि रास्वपाभित्र समेत बहस सुरु भएको छ ।
सरकारको लोकप्रियतामा कमी आए त्यसको असर पार्टीको जनाधारमा पर्न सक्ने भन्दै केही नेताहरूले चिन्ता व्यक्त गरिरहेका छन् । सरकारमा सहभागी मन्त्रीहरूको कार्यसम्पादन, नीतिगत निर्णयमा पार्टीको भूमिका तथा सरकारसँगको समन्वयलाई लिएर पनि पार्टीभित्र विभिन्न धारणा रहेको बताइएको छ ।
एक पक्षले सरकारका कमजोरीको जिम्मेवारी पार्टीले लिन नहुने धारणा राख्दै आएको छ भने अर्को पक्षले सरकारलाई थप प्रभावकारी बनाउँदै अघि बढ्नुपर्नेमा जोड दिँदै आएको स्रोतको दाबी छ ।
प्रधानमन्त्री शाह र लामिछानेबीचको पछिल्लो संवादपछि सरकार सञ्चालन, सत्ता साझेदारबीचको समन्वय तथा आगामी राजनीतिक कदममा थप स्पष्टता आउने अपेक्षा गरिएको छ ।
